Isa 22 | NdeIBE | STEP | Isiqalekiso ngesiGodi soMbono: Kuyini okukukhathazayo khathesi, wena sewakhwela phezu kwezimpahla zezindlu,

Isaiah 22

Isiphrofetho ngeJerusalema

1 Isiqalekiso ngesiGodi soMbono: Kuyini okukukhathazayo khathesi, wena sewakhwela phezu kwezimpahla zezindlu, 2 wena dolobho eligcwele iziphithiphithi, wena dolobho lokuxokozela lokuthokoza? Abafayo bakho ababulawanga ngenkemba, njalo kabafelanga empini.

3 Bonke abakhokheli bakho babaleke bebonke, bathunjiwe bengazange basebenzise mtshoko. Lonke lina elabanjwayo lathathwa ukuba libe yizibotshwa ndawonye, libalekile isitha sisesekhatshana.

4 Ngakho ngathi, “Sukani kimi; lingiyekele ngikhale kabuhlungu. Lingazami ukungiduduza ngenxa yokuchithwa kwabantu bakithi.”

5 UJehova, uJehova uSomandla, ulosuku lokuxokozela lokugxoba lokwesaba eSigodini soMbono, usuku lokudiliza imiduli lokumemezela ezintabeni.

6 I-Elami ithatha isikhwama semitshoko, labatshayeli balo bezinqola zempi, lamabhiza; iKhiri lambula ihawu.

7 Izigodi zakho ezinhle kakhulu zigcwele izinqola zempi, abagadi bamabhiza bamiswe emasangweni edolobho;

8 ukuvikelwa kukaJuda kususiwe. Ngalolosuku wathemba izikhali eziseSigodlweni seHlathi,

9 wabona ukuthi iDolobho likaDavida lalilezikhala ezinengi ezivikelweni zalo; wagcina amanzi eSizibeni esingaPhansi.

10 Wabala izindlu zaseJerusalema, wazidiliza ukuze kuqiniswe umduli.

11 Phakathi kwemiduli yomibili wakha indawo yokugcinela amanzi eSiziba esiDala. Kodwa kawukhangelanga kuLowo owasenzayo, kumbe umnake Lowo owaceba ukusenza kudala.

12 Ngalolosuku uJehova, uJehova uSomandla, wakubiza ukuba ukhale ulile, usiphune izinwele zakho, ugqoke isaka.

13 Kodwa khangela, kulokuthaba lokuthokoza, ukuhlatshwa kwezinkomo lokubalwa kwezimvu, ukudliwa kwenyama lokunathwa kwewayini! Lithi, “Kasidleni sinathe, ngoba kusasa sizakufa!”

14 UJehova uSomandla usekuvezile lokhu ngisizwa: “Lesisimo kasiyikuthethelelwa kuze kube lusuku lwakho lokufa,” kutsho uJehova, uJehova uSomandla.

15 Lokhu yikho okutshiwo nguJehova, uJehova uSomandla, uthi: “Hamba, uthi encekwini le, kuShebhina ongumphathi wesigodlo:

16 Wenzani lapha, njalo ngubani okuphe imvumo ukuba uzimbele ingcwaba lapha, ugubha ingcwaba lakho endaweni ephezulu, ugubha indawo yakho yokuphumula edwaleni?

17 “Qaphela, sekuseduze ukuthi uJehova akubambe aqinise, akuphosele khatshana, wena ndoda elamandla.

18 Uzakugoqa ngokuqinisa njengebhola akuphosele elizweni elikhulu. Uzafela khonapho. Lezigqoko zakho zempi ezinhle zizasala khonapho – wenza ihlazo endlini yenkosi yakho!

19 Ngizakususa esikhundleni sakho, njalo uzaxotshwa emsebenzini wakho.

20 “Ngalolosuku ngizabiza inceku yami, u-Eliyakhimi indodana kaHilikhiya.

21 Ngizamgqokisa izingubo zakho, ngimbophe ngebhanti lakho, ngimnike amandla akho. Uzakuba nguyise walabo abahlala eJerusalema lakwabendlu kaJuda. 22 Ngizabeka phezu kwamahlombe akhe isivulo sendlu kaDavida; akuvulayo kakho ongakuvala. 23 Ngizambethela njengesikhonkwane endaweni eqinileyo; uzakuba yisihlalo sobukhosi sasendlini kayise.

24 Lonke udumo lwakwabo luzakuba kuye, inzalo yakhona lezizukulwane zonke – izitsha zakhona ezincinyane, kusukela emiganwini kusiya kuzimbizanyana zonke.

25 “Ngalolosuku”, kutsho uJehova uSomandla, “isikhonkwane esabethelwa endaweni eqinileyo sizakhumuka; sizaqunywa siwe, umthwalo ophezu kwaso uzawela phansi.” UJehova usekhulumile.